పూసిన పున్నమి వెన్నెలమేన తెలంగాణ వీణ

వాసిగ చరితల వెలుగొందిన గత వైభవాల కోన పద గతుల వాణి స్వర జతుల వేణి ఉప్పొంగి మురిసె ఉల్లముల బాణి తాళాల జోల దరువూల యాల సంబూరమాడే సింగీడి మేళ అరే మోదుగుపూల వసంతహేల తంగెడుపూల బంగరు నేల జమ్మికొమ్మన పాలపిట్టల గంతులేసే ఆ జింక పరుగుల యిడుపు యిడుపున జానపదంబులు యింపుగ పూసిన కవనవనంబులు యెగిసి పారె యెన్నెన్నో యేరులు మురిసి ఆడే బతుకమ్మ ఊరులు బుద్ధుని పాదపుముద్రల బండ మన ఫణిగిరి కొండ పద్మనాయకుల దేవరకొండ మేటి రాచకొండ కొలనుపాక తీర్థంకర పాద వర్థమాన ముని తెలిపిన బోధ యాదగిరి నరసన్న మొక్కులు జానుపాడు సైదన్న సూక్తులు వడివడి కలబడి కుడి ఎడమల బడి గడీల పొగరును దించిన దళములు వాడిగ వడిసెల విసిరిన కరములు పడిపడి పరుగులుపెట్టిన జులుములు నందికొండ నీటితోనిండ ఊరు ఊరున పైరులు పండ కరువుల బరువులు జరుగును దూరం నల్లగొండ వరి తరి మాగాణం *పారేవాగులు పచ్చనికొండలు పరిమళమైన పూలగాలులు కీసరగుట్టలు హరికీర్తనలు శివతత్వంబులు అనంతగిరులు భూమిలదాగిన సలువకొండలు తాండూరు శాబాదు బండలు కుంకుమకన్నా మెత్తనిదుక్కులు కూరలుకాయలు కుప్పలరాసులు రంగారెడ్డి నేలకు విలువ కుంచములతో బంగారం కొలువ *పాలకుర్తి కవనపుమేళా భాగవతము ఘన పోతన లీల కాకతీయ గణపతివీర యుగంధరుడు యోచనలో ధీర పాకాల రామప్పచెరువులు గొలుసుకట్టు జలధార నెలవులు వేయిస్థంభముల శబ్దనాదములు పేరిణి భేరిణి నాట్యపాదములు సమ్మక్క సారక్కల తెగువ సర్వాయి పాపన్నను మడువ ఓరుగల్లు అడుగడుగున గుళ్ళు తలచుకుంటె పులకించును ఒళ్ళు !! *మేటి ఏలికలు శాతవాహనుల కోటిలింగముల పురమీనేల కోడెముడుపులకు భజనకొలువులకు వరములిచ్చె రాజన్నలీల ఊరి ఊరిలోన ఉక్కుని మించినట్టి కోట ఉబికే చరితల ఊట సిరిసిల్ల మగ్గాల నేత మేనికి అద్దిన సొగసులపూత కవనం భువనం ఎల్లలుదాట కరీం నగర్ వాగ్దేవికి బాట ౙానపీఠమై పూసినతోట *తెలుగువాకిట పరువంబొలికే కృష్ణవేణి ముఖద్వారం పుప్పొడిమించిన ఇసుకరేణువుల అందమైన దుందుభితీరం మన్నెంకొండ సిరిసినగండ్ల గట్టుకుర్మతీ జోగులాంబ రామగిరి శ్రీరంగాపురములు నల్లమల సలేశ్వరతీర్థం తరాలు గడిసినా వాడని వూడల ఊయలలూపే పిల్లలమర్రి పాలమూరు తల్లి !! *కొమురంభీం జోడెన్ ఘాట్ గిరిజనవీరుల చరితనుచాటు మేస్రం జాతి తప్పదు నీతి నడిపించే నాగోబా జ్యోతి గోండు కోలన్ థోటి ఆత్రం గుస్సాడినాట్యం నిర్మల్ సిత్రం బాసర్తీర్థం సంగమక్షేత్రం కుంటాల ఝరి జలసంగీతం ఇప్ప జిట్టా రేగు టేకు నల్లమద్ది దిరిశెనమాకు ఆదిలబాదుకు అడవే సోకు !! *జైనుల..బౌద్ధుల (2) బోధనశాల విష్ణుకుండినులు ఏలిన నేల జీనవల్లబుడు హరికేసరుడు పంపకవి ప్రవచించిన బోధలు ఇంద్రపురి కైలాసగిరి బాలకొండ దుర్గాలబరి నల్లరేగడి పసుపుయాగిడి చెరుకువెన్నులు పాలజున్నులు పంటసేల తళుకు పల్లె పరవశించి కులుకు పెద్దగుట్ట ఉరుసు బోధను చక్కరయ్యి కురుసు గలగల గలగల పైరుల మిలమిల నిజామబాదు సిరులకు కళకళ గలగల గలగల పైరుల మిలమిల నిజామబాదు సిరులకు కళక !! *పర్ణశాల..పర్ణశాల సీతమ్మ అడుగులు భద్రాచలమున నిత్య వేడుకలు కోనలెంట గోదావరి పరుగులు జంటగ కిన్నెరసాని నడకలు పగలేనీడలు పరిచినచందము పచ్చనిటేకు గొడుగులె అందము బొగ్గుబావులు అగ్గినెలవులు పాల్వంచ ఇల పంచేవెలుగులు గిరిజనజాతుల ఆయువుపట్టు ఆశయాలు విరబూసినచెట్టు ఖనిజరాశులకు తరగనిగట్టు ఉద్యమాలఖిల ఖమ్మం మెట్టు *మంజీర కంజీరనాదం సింగూరు జలపొంగుల హారం సంగమతీర్థం సాదులసత్రం ఏడుపాయల శైవక్షేత్రం మెతుకుదుర్గముల మేటికొలుపులు కోటనుమించిన చర్చితలుపులు చెరివిరాల బాగయ్య దరువులు యక్షగాన ఎల్లమ్మ అడుగులు మల్లినాథుని లక్ష్యణభాష్యం మాటనుపాటను పోటెత్తించిన నేతలుకవులను ఇచ్చినజిల్లా తల్లి మెదకు జిల్లా మలి ఉద్యమాల ఖిల్లా *మదిలో మెదిలే వదలని తావుల మనసుల కదిపే పల్లెగురుతుల బతుకుల యాగం బరువుల రాగం ఉరుకుల పరుగుల బరువుల తాళం మరపించీ మురిపించే ధామం భాగ్యనగరమే ఇంద్రభవనము ఆదరించమని చాపినదోసిట అక్షయపాత్ర హైదరబాద్ కుతుబ్ షాహీ అసఫ్ జాహీ ఘజల్ ముషాహీర్ సునోరె భాయీ చార్మినార్ మక్కామసీద్ పురానాపూల్ దేఖోరె భాయీ కొబ్బరితేటను మించిన ఊట ఉస్మాన్ సాగర్ గండిపేట గోలుకొండన ఎగిరే జెండా ఆశలు విరియును ప్రతి ఎదనిండా (2)