ఈ రోజు ఎంత ప్రియమైన రోజు
నునులేత సుప్రభాత వేళ
కలల్లోంచి మెలకువ లోకి వస్తున్నపుడు
పొద్దున్నే కురిసిన వసంత వానలో
తడిసే స్వాప్నికుడు
పాలుగారే ప్రపంచం చుట్టూ ఉన్నా
ఇంకా పాలకోసం గుక్కపెట్టే నవ శైశవ జీవనం
తాను తిరిగిన దారుల్లో దర్శించిన అనుభూతులను
రాతైనా గీతైనా సృజించి దర్శించడం
నీటి రంగుల చిత్రాల మేటి చిత్రకారుడా
ఆ మధ్యాహ్నం అడ్డతీగల అడవుల్లో
మబ్బుల మాటలు వినగల మొనగాడా
గోరంత గొంతుతో
అదొక పులకింతగా
భువనమోహన నిశ్శబ్ధాన్ని
భగ్నం చెయ్యగల వీరభద్రుడా
వయసు పెరిగేకొద్ది చిన్నవాడుగా
నిండుగా పూసిన మామిడి చెట్టు ఎదట మరింత పసివాడిగా
వసివాడని సాహితీ కుసుమాలను పండించే కృషీవలా
మా మామూలు వీధుల్లొ మామూలు ఉదయాల్లో
ఆకుపచ్చ జీవకాంతులు అందించు
వెయ్యేళ్ళు జీవించు మమ్మల్ని జీవింపచేసేందుకు
వెయ్యేళ్ళు జీవించు మమ్మల్ని జీవింపచేసేందుకు
వెయ్యేళ్ళు జీవించు మమ్మల్ని జీవింపచేసేందుకు
No comments:
Post a Comment