ఎంతటి వేసవి కాలంలోనైనా ఆరుబయట మంచాలేసుకుని ఆకాశంలో చూస్తూ అమ్మమ్మపక్కలో పడుకున్నప్పుడు ఆకాశంలో నక్షత్రాలను చూపిస్తూ అవే సప్తరుషులు, ఆపక్కనున్నాయేమో గొల్లకావిడని,అదిగో ఆపక్కది దృవుడని చెప్పిన రోజులు ఏవైపోయినియ్యీవివి.,

చిన్ననాటి మనపల్లెలేం పట్టణాలైపోలేదుగాని.,
ఆరోజుల్లో తోటివారి కష్టసుఖాల్లో స్పందించే హృదయాల్లా మెత్తగావుండే మట్టిరోడ్లు.,
ఈరోజుల్లో ఎటువంటి స్పందనలులేని హృదయాల్లా గట్టిగా సిమెంటురోడ్లుగా మారిపోయినియ్యంతే,

వేసవికాలం సెలవుల్లో పిల్లలంతా కలసి చేలగట్లంటా, కాలవగట్లంటా తిరుగుతూ ఆడుకుంటూ సాయంత్రానికి ఇంటికిజేరుకునే పిల్లలేవయ్యారు?

సాయంత్రమయ్యేసరికి గుడరుగుమీద కూర్చుని గుడిమైకుసెట్లో ఏసే భక్తిపాటలనుంచి భగవద్గీత వరకూ కంఠతా వచ్చేసి కూడా పాడుకుంటూ పోయినరోజులేవీవి?

పెద్దోల్లు గుడికాడ కాలీస్దలంలో వాలీబాలు, బాల్ బేడ్మింటన్  ఆడతుంటే వాల్లకి బంతి అందించటానికి ఎంతలా తోసేసుకునేవాల్లం.,! ఆరోజులేయీవివి?

చేలోమయంగా పోయి ఎండిపోయిన ఆనప్పాదు పుల్లలని బీడిల్లాగ , అరటి ఆకులని చుట్టల్లా దొంగచాటుగా,ఎవరూ చూడకుండా కాల్చినరోజులు ఏవైపోయినియ్?

పిప్పరమెంటు బిల్లతిని నీల్లుతాగుతుంటే సల్లగా వున్నాయని కడుపు పట్టనన్ని మంచినీరు తాగేసివోల్లంకదా! ఆరోజులు ఏవైపోయినియ్యీవివి?

సినిమాహాలుకాడ పాడేసిన సినిమారీల్లుతో బూతద్దం, కరెంటుబలుబుతో తెల్లటి గోడమీద సినిమాలేసుకుని దియేటరు వోనరులా ఫీలైపోయిన ఆరోజులేవైపోయినియ్యిావివి?

బేటరీలైటులో బల్బు బేటరీ బయటకుతీసి ఒకవైరు ముక్క బేటరీకి కిందపైనపెట్టి బేటరీ బొడిపమీద బలుబెట్టి ఆబలుబు ఎలిగినప్పుడు పెద్ద ఇంజనీరులా ఫీలైపోయిన ఆరోజులు ఏవీవివి?

కాలువలో జిగురుమట్టి తెచ్చుకుని దాంతో ఎద్దులు, బండి, ట్రాక్టరు, అలాఎన్నో బొమ్మలుచేసుకుని, మట్టితో బొంగరాలు చేసి మయంగా అగ్గిపుల్ల గుచ్చి తెగతిప్పేసీవోల్లుం., ఆరోజులేవైపోయినియ్యీవివి?

కొబ్బరాకులతో అమ్మాయి,అబ్బాయిల బొమ్మలచేసి వాటికి పెళ్ళిచేసి ఉత్తుత్తి భోజనాలెట్టుకుని., అవితిన్నట్టుగా ఆడుకునే ఆటలుకూడా వున్నాయని ఇప్పటి పిల్లలకు తెలుసంటావా ఇవివి?

ఆటలాడుతూ పడిపోతే మోచిప్పలు,మోకాల్లు పగిలిపోతే దానికి గుంటగరగరాకు పసరు పిండితే కొన్నిసెకన్లపాటు బగ్గుమని మండినాకాని రెండురోజుల్లో ఎంతపెద్ద గాయమైన మాడిపోయే ఆరోజులేవైపోయినియ్యీవివి?

ఏజన్మలో చేసుకున్న పుణ్యవోకాని ఆరోజులని, ఈరోజులని చూసే అదృష్టం దక్కింది., అంతటి అందమైనరోజులు నాకెప్పుడూ మరపురావు.,
వాటిని మీకూ గుర్తుచేద్దావని రాసిందే ఇది..,