నా కవన జీవనం! సత్యసాయి విస్సా

తెలుగువల్లి వెలుగు దివ్వెల మల్లెలం      21-11-2020,  18:30 

తెలుగువల్లి మల్లెపరిమళాల

ప్రణమిల్లు శుభతరుణం 

ఏ జన్మాంతరాల ఋణమో    

పూర్వ పుణ్యాల ఫలమో 

ఈ  తెలుగు దివ్య జీవనం 

దివ్య గోదావరాది నదీ జలపానం 

ఆ తెనెలొలుకు పలుకు పలికి 

సాహితీ వెలుగుల శోభిల్ల

విశ్వమంతయు పరవశించి వహ్వయన 

తెలుగువల్లి మల్లియ వోలె 

పరిమళించి ప్రణమిల్లి  

ఋణము తీర్చుకుందాము తమ్ముడా చెల్లెలా 

చేసుకుందాము తెలుగు జీవన సాఫల్యం! 

తెలుగువల్లి మల్లెపరిమళాల

ప్రణమిల్లు శుభతరుణం! 

---------------------------------------------------------

ధన్య జీవనం!..ధాన్య ధన జీవనం!!

కొండా కొనల

స్వేచ్ఛగా  

అచ్చంగా

స్వచ్చంగా

అమాయకపు పల్లె

అందం

అదే ధ్యాసగా

చెరిగే బియ్యం

చెదిరి ఎగిరిన

చందం  

చూసే కనులకు

విందుగా

భలే పసందుగా

చిత్రంగా

చిత్రంలో

బందీ అయ్యిన

వైనం

రేపటి చింత లేని

ధన్య జీవనం! ...ధాన్య ధన జీవనం!!

---------------------------------

జయము జయము సిలికానాంధ్రదళమునకు 

జయము దిగ్విజయము ఆనందదళపతికిన్

విశ్వ మంత సాంస్కృతిక వెలుగు నింప

వెలిగెనొక దివ్వె

సిలికానాంధ్ర విశ్వవిద్యాలయము

వెలిగించె నొకండు కడు ఆనందముగను

ముందు తరములు ముదమునంద

చెయ్యెత్తి జైకొట్టగా జనులారా రండు

జైకొట్టుటే కాదు చేయి కలిపి చేతనౌ సాయమున

పదము పదము కలిపి సాగగా ప్రగతి పధమున

బిందువు బిందువు సింధువవు నటుల

మనబడి, మన కూచిపూడి, అన్నమయ్య 

ఎన్నియో ఘనకార్యముల

సిలికానాంధ్రము ఆనంద సంద్రమై 

జగతినెదిగి జాతికి ఖ్యాతి తెచ్చే

జయము జయము సిలికానాంధ్రదళమునకు 

జయము దిగ్విజయము ఆనందదళపతికిన్

--------------------------

నీలాల నింగిని అనుక్షణం

అలల కలలతో తనలో

ప్రతిబింబించుకుంటూ

కలవరపు కెరటాలతో అందుకోవాలని

వాడిచూపుల వేడి నిట్టూర్పులు

విరహపు ఆవిరి మేఘసందేశాల

సాగర ఆరాటాన్ని చూసి

అల్లంత దూరాన దిగంతాన

నింగి వంగి చుంబిస్తోంది!

 25-09-16...5.15pm

-------------------------------------

శభాష్! చెన్నై నీవు త్వరగా కోలుకోవాలి!!

నిన్నమొన్నటి దాకా వన్నె చిన్నెల చెన్నై

నేడు చిన్నబోయిన చెన్నై ...వన్నెతగ్గిన చెన్నై

ప్రకృతి కన్నెర్ర చేసి నీటముంచినా...వెన్నుచూపని చెన్నై

శభాష్ చెన్నై నీవు త్వరగా కోలుకోవాలి!

నీ కష్టం ఇతర నగరాలకి మేలుకొలుపు కావాలి!!

సాగరతీరాన సుందరనగరం

నిరంతరం ఆక్రమించాలన్నఆత్రం జలతరంగాల ఆశయం

నెరవేరి యెడ తెగకుండా కురిసిన వర్షం వేళ!

యేరు ఊరు వాడా ఏకమై జలాశయం అయ్యింది!

బలవంతుడ, ధనవంతుడ నాకేమని చెరువు గురుతులు చెరిపి

ఆకాశానికి నిచ్చెనేసిన భవనాలు... జలానికి చిక్కిన వైనం...

పల్లమెరిగిన నీరు ముంచిన తీరు... నిజమెరిగిన దేముడి తీర్పుకు

బతుకు బేజారై... పాండీ బజారుపాలైన వైనం

ఒకటా రెండా ఇరవై రోజులు సూరీడు ముఖం చాటేసి

చుట్టూనీరు... కన్నీరు మున్నీరు... తాగటానికి లేదు తన్నీరు

నాలుగు గోడలు మధ్య బితుకు బితుకు బతుకు ఎటూ వెళ్ళ వీలు లేదు

కోట్లున్నా...ఆకలి తీర్చే కొట్టు లేదు

సాటి మనుషులతో అవసరం లేని

అవసరాల అన్వేషణలో... ఆవిష్కరణలన్నీమూగబోయినవేళ

మనసున్న మనుషుల ఆసరా...కొండంత ఓదార్పు

ఈ ఆపత్కాలంలో.. చెన్నై చూపిన నేర్పు ఓర్పుతో భావికై ఎదురుచూపు

జాతి కుల మత ఎల్లలు చెరిపి ప్రకృతి నేర్పిన పాఠం! మనకి గుణపాఠం కావాలి!!

మన జీవనంలో మార్పు తీసుకు రావాలి! ప్రకృతితో సహజీవన మార్పు తేవాలి!!

శభాష్! చెన్నై నీవు త్వరగా కోలుకోవాలి!!శభాష్! చెన్నై నీవు త్వరగా కోలుకోవాలి!!

మణిసాయి విస్సా ఫౌండేషన్.