మంజీరమ్మ పాద మంజీర జీవభావం! సత్యసాయి విస్సా - మంజీరక దేశం

 

మంజీరమ్మ పాద మంజీర జీవభావం!

దివినుండి భువికి మా కొరకు ఉరికిన ఓ గోదారమ్మ చెల్లీ!

మా మంజీరమ్మ తల్లీ! వందనం

రావమ్మా నీ గజ్జెల రవళి

ఘల్లు ఘల్లు మంటూ

జన హృదయాలు జల్లుమనగా

గలగలా పారి సేదతీర్చగ వడి వడిగా సాగి

మా నేతల భగీరథ యత్నాలు రత్నాలు కాగా

సింగూరున ఆగి ఒక్కోక్క చుక్కగా మా గొంతులో జారి

వాగుగా పారి మా తెలంగాణా మాగాణమ్ముల చేరి

వరివై, జొన్నవై, చెరకువై, కూరవై మా ఆహారమై,

పత్తివై మా ఆహార్యమై

మెతుకు సీమ విశ్వానికే బతుకు నిచ్చు సీమగా మార్చి

మమ్ము దీవించు తల్లీ మంజీరమ్మా వందనం!

సతతము నీ పాద మంజీరాలంటిన జీవులం తల్లీ

మా ఊపిరి నీవు మా ఊహవు నీవు

మా ఉనికివి నీవు మా మనికివి నీవు

మా జీవము నీవు మా జవము నీవు మా రాజస రాజీవము నీవు

మా రసరాజం నీవు మా మానసం నీవు మా సాహసం నీవు

మా ఉల్లాసం నీవు మా ఉత్తేజం నీవు

సదా నీ పాద మంజీరాలు అంటి వుండే జీవులం

మమ్ము దీవించు తల్లీ మంజీరమ్మా వందనం!!

మంజీరమ్మ పాద మంజీర జీవభావం!

సత్యసాయి విస్సా - మంజీరక దేశం

(మెదక్‌ జిల్లాలో ఉన్న మంజీర నదిని ఒకప్పుడు ఈ నేలను మంజీరక దేశం పిలిచే వారని చరిత్ర)