అ - ఱ

'అ'మ్మ పెట్టిన గోరుముద్దలతో
'ఆ'నందంగా బడి కెళ్తారు..
'ఇ'క్కడ అక్కడ
'ఈ'లలు వేస్తూ
'ఉ'రకలు వేస్తూ
'ఊ'యల ఉడతల కథలే వింటూ
'ఋ'ణమో పణమో ఏమీ తెలియక
'ౠ' అని దీర్ఘం తీస్తూ
'ఎ'రుపు,నలుపు,పసుపు ,తెలుపు అంటూ
'ఏ'డు రంగుల సీతాకోకచిలుకల్లాగా
'ఐ'దుగురో ఆరుగురో స్నేహితులతో కలిసి
'ఒ'ప్పుల కుప్ప ఆటలు ఆడి
'ఓ'డల ఒంటెల కథలే వింటూ
'ఔ'రా అనిపించే ఆశ్చర్యాలతో
'అం'దరు ఎంతో సంతోషించి
'అః' అంటూ మురిసిపోతారు....
.
'క'లము కావాలని మారాం చేస్తే
'ఖ'ర్జూరపు పండు నాన్నే ఇస్తే
'గ'బగబా తిని
'ఘ'ణ ఘణ గంటలు గుండెల్లో మోగగా
'జ్ఞా'పకాలే అల్లేసుకుంటారు..
.
'చ'క చక బడికి వెళ్లి
'ఛ'లో అంటూ క్లాసుకి చేరుకోని
'జ'తగా అందరు కూడి
'ఝ'మ్మని ఎవరి సీట్లలో వాళ్లు కూర్చొని
'ఞ'(ఇని) మాస్టారు చెప్పింది రాస్తారు..
.
'ట'క్కరి పిల్లలందరు
'ఠ'పీమని శబ్దం చేస్తే
'డ'ప్పుల మోతల్లె ఆ శబ్దానికి
'ఢ'మాల్ అని బెత్తంతో సారు వాయిస్తారు
'ణ'ణణణణ అని ఇంటి గంట మొగంగా
.
'త'లుపు తోసుకుని
'థ'పా థపామని
'ద'బ్బున పిల్లలందరు
'ధ'న ధన చప్పుడు చేస్తూ
'న'డచుకుంటూ కొందరు బయటికి వస్తే
.
'ప'రుగులతో కొందరు
'ఫ'స్టునేనంటే నేనని
'బ'యటకు వెళ్లి
'భ'లే భలే
'మ'న మంచి బడియని కొందరు
'యా'హూ అంటూ కొందరు
'ర'యిలు ఇంజనంత హుషారుగా
'ల'యబద్దంగా జతగా
'వ'డివడిగా బయటకు వచ్చి
'శ'బ్దాలు పెద్ద పెద్దగా చేస్తూ
'ష'రతులు వేసుకుంటూ ముందు ఇంటికి నువ్వానేనా అని
'స'రదాగా గంతులు వేస్తూ వెళుతూ
'హా'య్ అని చెప్పుకున్న మనసులు బాయ్ చెప్పుకుని
గ'ళ'మెత్తి ఈరోజుకు ఇక సెలవు అని
ల'క్ష'ణంగా
'ఱ'య్యిన అందరు ఇంటికి చేరిపోతారు!!