కరుణశ్రీ గారి మందార మకరందాలు!
.
అనసూయాదేవి
గర్భములేదు - కష్టపడి కన్నది లే - దిక బారసాల సం
దర్భము లే - దహో ! పురిటిస్నానముల్ నడికట్లులేవు - ఏ
స్వర్భువనాలనుండి దిగివచ్చిరి నీ ప్రణయాంక పీఠి కీ
యర్భకు ? లంతులేని జననాంతర పుణ్యతపఃఫలమ్ములై.
మహాకవి పోతన !
(కరుణశ్రీ గారి మందార మకరందాలు - )
ఉ.
గంటమొ చేతిలోది ములుగఱ్ఱయొ ? నిల్కడ యింటిలోననో
పంటపొలానొ ? చేయునది పద్యమొ సేద్యమొ ? మంచమందు గూ
ర్చుంటివొ మంచెయందొ ? కవివో గడిదేరిన కర్షకుండవో ?
రెంటికి చాలియుంటివి సరే ! కలమా హలమా ప్రియం బగున్ ?
ఉ.
కాయలు గాచిపోయినవిగా యరచేతులు ! వ్రాతగంటపున్
రాయిడిచేతనా ? మొరటు నాగలిమేడి ధరించి సేద్యమున్
జేయుటచేతనా ? కవికృషీవల ! నీ వ్యవసాయదీక్ష " కా
హా " యని యంతలేసి కనులార్పక చూచిరిలే దివౌకసుల్ !
ఉ.
"నమ్ముము తల్లి నాదు వచనమ్ము ; ధనమ్మునకై బజారులో
అమ్మనుజేశ్వరాధముల కమ్మను ని " న్నని బుజ్జగించి నీ
గుమ్మములోన నేడ్చు పలుకుం జెలి కాటుకకంటి వేడి బా
ష్పమ్ములు చేతితో తుడిచివైచెడి భాగ్యము నీకె యబ్బెరా ! !
ఉ.
కమ్మని తేటతెల్గు నుడికారము లేరిచి కూర్చి చాకచ
క్యమ్ముగ కైత లల్లు మొనగాండ్రు కవీశ్వరు లెంతమంది లో
కమ్మున లేరు - నీవలె నొకండును భక్తి రసామృత ప్రవా
హమ్ముల కేతమెత్తిన మహాకవి యేడి తెలుంగు గడ్డపై ?
సీ.
భీష్ముని పైకి కుప్పించి లంఘించు గో
పాలకృష్ణుని కుండలాల కాంతి
కరిరాజు మొఱపెట్ట పరువెత్తు కఱివేల్పు
ముడివీడి మూపుపై బడిన జుట్టు
సమరమ్ము గావించు సత్య కన్నులనుండి
వెడలు ప్రేమక్రోధ వీక్షణములు
కొసరి చల్దులు మెక్కు గొల్ల పిల్లల వ్రేళ్ళ
సందు మాగాయి పచ్చడి పసందు
గీ.
ఎటుల కనుగొంటివయ్య ! నీ కెవరు చెప్పి
రయ్య ! ఏరాత్రి కలగంటివయ్య ! రంగు
కుంచెతో దిద్దితీర్చి చిత్రించినావు !
సహజపాండితి కిది నిదర్శనమటయ్య ! !
ఉ.
ముద్దులుగార భాగవతమున్ రచియించుచు, పంచదారలో
నద్దితివేమొ గంటము మహాకవిశేఖర ! మధ్య మధ్య అ
ట్లద్దక - వట్టిగంటమున నట్టిటు గీచిన తాటియాకులో
పద్దెములందు - ఈ మధుర భావము లెచ్చటనుండి వచ్చురా ?
ఉ.
ఖ్యాతి గడించుకొన్న కవు లందరు లేరె ! అదేమి చిత్రమో
పోతన యన్నచో కరిగిపోవు నెడంద, జోహారు సేతకై
చేతులు లేచు ; ఈ జనవశీకరణాద్భుతశక్తి చూడగా
నాతని పేరులో గలదొ ; ఆయన గంటములోన నున్నదో !
--------
No comments:
Post a Comment